ಮಂಗಣ್ಣ ಎಂಬ ಅದ್ಭುತ !

"ಈ ಮಂಗಗಳ ಕಾಟ ತಡಿಯೋಕಾಗಲ್ಲ . ನನ್ನ ತರಕಾರಿ ಗಿಡದ ಚಿಗುರು ಕೂಡ ಬಿಡದೆ ತಿಂದು ಬಿಡುತ್ತವೆ . ಅವುಗಳಿಗೆಷ್ಟು ಬುದ್ದಿ ನೋಡು , ಮಧ್ಯಾನ್ಹ ನಾನು ಮಲಗುವ ವೇಳೆ ಅವಕ್ಕೆ ಚೆನ್ನಾಗಿ ಗೊತ್ತಾಗುತ್ತದೆ . ಸರಿಯಾಗಿ ಅದೇ ಸಮಯಕ್ಕೆ ಬಂದು ಲೂಟಿ ಮಾಡುತ್ತವೆ ." ಅಮ್ಮ , ಎದುರಿನ ತೆಂಗಿನ ಮರದಲ್ಲಿ ಕುಳಿತು ತೆಂಗಿನ ಮಿಳ್ಳೆಗಳನ್ನು ತಿನ್ನುತ್ತಿದ್ದ ಮಂಗಗಳನ್ನು ನೋಡುತ್ತ ಹೇಳುತ್ತಿದ್ದರು .
"ಹೋಗಲಿ ಬಿಡಮ್ಮ ಪಾಪ ಅವಕ್ಕೆ ಕಾಡಲ್ಲಿ ತಿನ್ನಲೇನೂ ಸಿಗದೆ ಇಲ್ಲಿ ಬರುತ್ತವೆ . ಅವಕ್ಕೆ ಆಹಾರ ಕೊಟ್ಟ ಪುಣ್ಯ ಸಿಗುತ್ತೆ ಬಿಡು " ಎಂದ ನನ್ನನ್ನು ದುರುಗುಟ್ಟಿ ನೋಡುತ್ತಾ " ಹೋಗಿ ಹೋಗಿ ನಿನ್ನ ಹತ್ತಿರ ಹೇಳುತ್ತಿದ್ದೇನಲ್ಲ " ಎಂದು ಹೇಳಿ ಅವುಗಳನ್ನೋಡಿಸಲು ಹೊರಟರು. ನಾನೂ ಹಿಂಬಾಲಿಸಿದೆ .

ಕ್ಯಾಮರವನ್ನು ಗಾಬರಿಯಿಂದ ನೋಡುತ್ತಿರುವ ಮಂಗಣ್ಣ

ಒಂದು ದೊಡ್ಡ ಮಂಗ ಮತ್ತೆ ನಾಲ್ಕು ಚಿಕ್ಕ ಮಂಗಗಳು ತಮ್ಮದೇ ಸಾಮ್ರಾಜ್ಯವೆಂಬಂತೆ ಕಾಯಿ ಚಿಗುರುಗಳನ್ನು ತಮ್ಮ ಬಾಯೊಳಗೆ ತುರುಕುತ್ತ ಅತ್ತಿಂದಿತ್ತ ಹಾರುತ್ತಿದ್ದವು . ನಮ್ಮನ್ನು ನೋಡುತ್ತಿದ್ದಂತೆ , ಎಲ್ಲವೂ ತಮ್ಮ ಹಲ್ಲು ಕಿರಿದು ಬಂದುಬಿಡುತ್ತೇನೆ ನೋಡು ಎಂಬಂತೆ ಅಭಿನಯಿಸುತ್ತಾ ಹೆದರಿಸಿದವು .
ನೋಡು ಇವಕ್ಕೆ ಸ್ವಲ್ಪವೂ ಭಯವಿಲ್ಲ ನಮಗೇ ಹೆದರಿಸುತ್ತವೆ , ಅಮ್ಮ ಕೋಲು ತೋರಿಸುತ್ತಾ ಹೆದರಿಸಲು ಪ್ರಯತ್ನಿಸಿದರೂ ಅವು ನಿರಾತಂಕವಾಗಿ ತಮ್ಮ ಕಾರ್ಯ ಮುಂದುವರೆಸಿದ್ದವು.

ದವಡೆಯಲ್ಲಿ ಅಹಾರವನ್ನು ತುಂಬುತ್ತಿರುವ ಮರಿಮಂಗ

ನಾನು ಕ್ಯಾಮರ ಹಿಡಿದು ಬಂದೆ . ನನ್ನ ಕೈಯಲ್ಲಿ ಕ್ಯಾಮರ ಕಂಡ ಕ್ಷಣ ಎಲ್ಲವೂ ವಿಧವಿಧ ಶಬ್ದ ಮಾಡುತ್ತಾ ಮರಗಳ ನಡುವೆ ಮರೆಯಾದವು . ಕ್ಯಾಮರವನ್ನು ಅವು ಕೋವಿಯೆಂದು ಭಾವಿಸಿದವೇನೋ . ನನಗೆ ತಕ್ಷಣ ವರ್ಷದ ಹಿಂದೆ ಬನ್ನೇರುಘಟ್ಟದಲ್ಲಿ ನೋಡಿದ ಮಂಗಗಳ ನೆನಪಾಯಿತು . ರಾಜಕಾರಣಿಗಳಂತೆ , ಸಿನೆಮಾ ತಾರೆಯರಂತೆ ಅವು ಫೋಟೊಗೆ ಫೋಸ್ ಕೊಟ್ಟಿದ್ದವು. ದಿನಾ ಬರುವ ಪ್ರವಾಸಿಗರ ಕೈನಲ್ಲಿರುವ ಕ್ಯಾಮರ ನಿರಪಾಯಕಾರಿಯೆಂದು ಅವಕ್ಕೆ ಗೊತ್ತು . ಆದರೆ ಈ ಹಳ್ಳಿಯ ಮಂಗಗಳಿಗೆ ಇದೇನೋ ವಿಚಿತ್ರವೆನ್ನಿಸಿ ಓಡಿದವು.
"ನಿನ್ನ ಕ್ಯಾಮರ ಇಲ್ಲೇ ಇಟ್ಟು ಹೋಗು ನನಗೆ ಮಂಗವನ್ನೋಡಿಸಲು ಸಹಾಯವಾಗುತ್ತೆ! " ಅಮ್ಮ ನಗುತ್ತಾ ಹೇಳಿದರು.
ಇಟ್ಟರೂ ಉಪಯೋಗವಿಲ್ಲಮ್ಮ , ಎರಡೇ ದಿನದಲ್ಲಿ ಅವುಗಳಿಗೆ ಇದು ಅಪಾಯಕಾರಿಯಲ್ಲವೆಂದು ತಿಳಿದುಬಿಡುತ್ತದೆ . ನಾನು ಹೇಳಿದಾಗ ನಿಜ ಮಾರಾಯ್ತಿ ನಮಗಿಂತ ಬುಧ್ದಿಯಿದೆ ಅವಕ್ಕೆ ಎನ್ನುತ್ತಾ ಒಳಹೊರಟರು.

ಯಾರೆಷ್ಟಾದ್ರೂ ಫೋಟೊ ತೆಗೀರಿ ಎನ್ನುತ್ತಿರುವ ಬನ್ನೇರುಘಟ್ಟದ ಮಂಗ

balenced diet!!

ಮಾನವನ ಪೂರ್ವಜರೆಂದೇ ಕರೆಸಿಕೊಳ್ಳುವ ಮಂಗಗಳ ಗುಣ ಲಕ್ಷಣಗಳು ಮಾನವರನ್ನೇ ಹೋಲುತ್ತವೆ .

ದೈಹಿಕವಾಗಿ ಕೈ ಕಾಲು ಬೆರಳುಗಳ ರಚನೆ ಅವುಗಳ ಮರದಲ್ಲಿ ವಾಸಿಸುವ ಜೀವನಶೈಲಿಗನುಗುಣವಾಗಿದೆ . ಕೊಂಬೆಯನ್ನು ಭದ್ರವಾಗಿ ಹಿಡಿಯಲು ಹೆಬ್ಬೆರಳು ಮತ್ತು ಅದಕ್ಕೆ ಅಭಿಮುಖವಾಗಿರುವ ಉಳಿದ ನಾಲ್ಕು ಬೆರಳುಗಳು ತುಂಬ ಉಪಯುಕ್ತವಾಗಿವೆ. ಬಾಲ ದೇಹದ ಬ್ಯಾಲೆನ್ಸ್ ಕಾಪಾಡುತ್ತದೆ.

ಬಾಯಿಯ ಒಳಗೆ ಹೆಚ್ಚಿನ ಸ್ಥಳವಿದೆ . ಶತ್ರುಗಳ ಭಯದಲ್ಲಿ ಬೇಗ ಬೇಗ ಅಹಾರ ತಿನ್ನುವಾಗ ದವಡೆಯ ಬಳಿಯ ಹೆಚ್ಚುವರಿ ಜಾಗದಲ್ಲಿ ಅಹಾರನ್ನು ತುಂಬಿಕೊಂಡು ನಂತರ ವಿರಾಮದಲ್ಲಿ ಅದನ್ನು ನಿಧಾನವಾಗಿ ಜಗಿದು ನುಂಗುತ್ತದೆ.

ಮಂಗಗಳು ಗುಂಪಾಗಿ ವಾಸಿಸುವ ಸಂಘಜೀವಿಗಳು . ಒಂದು ಗುಂಪು ಅದಕ್ಕೊಬ್ಬ ದೊಡ್ಡ ಗಂಡು ಮಂಗ ನಾಯಕ , ಆ ಗುಂಪಿನದೇ ಪ್ರತ್ಯೇಕ ಸಾಮ್ರಾಜ್ಯ ಎಲ್ಲವೂ ಇರುತ್ತದೆ . ತನ್ನ ಸಾಮ್ರಾಜ್ಯದಲ್ಲಿ ಬೇರೆ ಗುಂಪು ಪ್ರವೇಶಿಸಿದರೆ ಅವುಗಳ ನಡುವೆ ಘನಘೋರ ಯುಧ್ಧ ನಡೆಯುತ್ತದೆ . ಅದಲ್ಲದೆ ಎರಡು ಗಂಡುಗಳ ನಡುವೆ ಹೆಣ್ಣಿಗಾಗಿಯೂ ಯುಧ್ದ ನಡೆಯುತ್ತದೆ. ಅಂದರೆ ಹೆಣ್ಣು , ಮಣ್ಣಿಗಾಗಿ ಹೋರಾಡುವುದು ಮಾನವನಿಗೆ ಪೂರ್ವಜರ ಬಳುವಳಿ ಅಲ್ಲವೆ!

ಮರಿಗಳನ್ನು ತುಂಬ ಪ್ರೀತಿಯಿಂದ ಸಾಕುತ್ತವೆ . ತನ್ನ ಜೊತೆಗೇ ಮರಿಗಳನ್ನು ಹೊತ್ತೊಯ್ಯುವ ತಾಯಿ ಅದಕ್ಕೆ ಆಹಾರ ಸಂಗ್ರಹಣೆ , ಶತ್ರುಗಳಿಂದ ತಪ್ಪಿಸಿಕೊಳ್ಳುವ ಕಲೆ ಕಲಿಸುತ್ತದೆ.

ಅಕಸ್ಮಾತ್ತಾಗಿ ಸತ್ತ ಮರಿಗಳನ್ನು ದಿನಗಟ್ಟಲೇ ಹೊತ್ತು ಓಡಾಡುವ ಮಂಗಗಳನ್ನು ಕಾಣುತ್ತೇವೆ . ಅದು ದುಖಃದಿಂದಲೋ ಅಥವಾ ಸತ್ತದ್ದು ತಿಳಿಯದೆಯೊ , ಅಥವಾ ಅದೊಂದು ಸಹಜ ಕ್ರಿಯೆಯೊ ಎಂಬ ಬಗ್ಗೆ ವಿಜ್ಞಾನಿಗಳಲ್ಲೇ ಅಭಿಪ್ರಾಯ ಭೇದಗಳಿವೆ.

ತುಂಬ ಚಟುವಟಿಕೆಯ ತುಂಟಾಟಕ್ಕೆ ಉಪಮೆಯಂತೆ ಬಳಸಲ್ಪಡುವ ಇವುಗಳು ವಿವಿಧ ರೀತಿಯ ಶಭ್ದಗಳ ಮೂಲಕ ಸಂವಹಿಸುತ್ತವೆ. ಶತ್ರುಗಳ ದಾಳಿ , ಆಹಾರವಿರುವ ಸ್ಥಳ , ಸಂಗಾತಿಗೆ ಸೂಚನೆ , ಮರಿಗಳ ಮೇಲಿನ ಪ್ರೀತಿ ಎಲ್ಲವನ್ನು ಬೇರೆ ಬೇರೆ ರೀತಿಯಲ್ಲಿ ಶಬ್ದಗಳನ್ನು ಹೊರಡಿಸುವುದರ ಸೂಚಿಸುತ್ತವೆ.

"ತಲೆಯಲ್ಲಿನ ಹೇನು ತೆಗೆಸಿಕೊಳ್ಳದಿದ್ದರೆ ಮಂಗನ ಕೈಗೆ ಕೊಡುತ್ತೇನೆ ನೋಡು ! ಅದು ಅಲುಗಾಡಿದರೆ ಎರಡೇಟು ಕೊಟ್ಟು ಹೇನು ತೆಗೆದು ತಿನ್ನುತ್ತದೆ " ಎಂದು ಅಮ್ಮ ನಾನು ಚಿಕ್ಕವಳಿದ್ದಾಗ ಹೇನು ತೆಗೆಸಿಕೊಳ್ಳಲು ಹಠ ಮಾಡಿದರೆ ಹೇಳುತ್ತಿದ್ದರು . ಮಂಗಗಳು ಪರಸ್ಪರ ದೇಹದ ಕೂದಲುಗಳಲ್ಲಿರು ಹೇನು , ಸೀರುಗಳನ್ನು ತೆಗೆದು ತಿನ್ನುತ್ತವೆ ಎಂಬ ನಂಬಿಕೆಯಿದ್ದರೂ ಅದು ನಿಜವಲ್ಲ . ಚರ್ಮದಿಂದ ಸ್ರವಿಸಲ್ಪಡುವ ಕೆಲ ವಸ್ತುಗಳನ್ನು ಹುಡುಕಿ ತಿನ್ನುತ್ತವೆ , ಮತ್ತು ಕೂದಲುಗಳನ್ನು ಕೈಯಿಂದ ನೆವರಿಸುತ್ತವೆ . ಇದು ಅವುಗಳಲ್ಲಿ ಪ್ರೀತಿ ಅಭಿವ್ಯಕ್ತಿಸುವ ವಿಧಾನಗಳಲ್ಲಿ ಒಂದಂತೆ.

ಇನ್ನೊಂದು ಮುಖ್ಯವಾದ ವಿಚಾರವೆಂದರೆ ಅವುಗಳ ಕಲಿಕಾ ಸಾಮರ್ಥ್ಯ. ಪರಿಸ್ಥಿತಿಯನ್ನು ಗ್ರಹಿಸುವ , ಹೊಸದನ್ನು ಕಲಿಯುವ ಸಾಮರ್ಥ್ಯ ಅವಕ್ಕೆ ಹೆಚ್ಚಿದೆ. ಅದ್ದರಿಂದಲೇ ಅವುಗಳು ದಟ್ಟ ಕಾಡಿನಲ್ಲೂ , ಮೆಟ್ರೋಪಾಲಿಟನ್ ಸಿಟಿಗಳಲ್ಲೂ ಸಮರ್ಥವಾಗಿ ಬದುಕಬಲ್ಲವು.