ಗುಬ್ಬಚ್ಚಿ ಗುಬ್ಬಚ್ಚಿ ನನ್ನ ಮನೆ ಕೊಡ್ತೀನಿ ನಿನ್ನ ಮನೆ ಕೊಡ್ತೀಯಾ

ಚಿಕ್ಕವಳಿದ್ದಾಗ  ಅಡುಗೆ ಆಟ ನನ್ನ ಮೆಚ್ಚಿನ ಆಟವಾಗಿತ್ತು ( ಈಗ  ಅಡುಗೆ ಮಾಡೋದು ಪರಮ ಬೋರು ಕೆಲಸ ಅನ್ನಿಸುವುದಿದೆ ಬಿಡಿ ). ತೆಂಗಿನ ಗರಟೆಯೆ ಪಾತ್ರೆ , ಅದರಲ್ಲಿ ಹುಡಿ ಮಣ್ಣಿನ ಅನ್ನ , ಹಾಲವಾಣ ಸೊಪ್ಪಿನ ಪಲ್ಯ , ಕೆಮ್ಮಣ್ಣಿನ ಸಾರು ......ಇದನ್ನೆಲ್ಲ ಮಾಡಲು ಮನೆಯ ಅಂಗಳದ ತುದಿಯಲ್ಲೊಂದು ತೆಂಗಿನ ಮಡಿಲು ಹೊದಿಸಿ ನಾವೇ ಕಟ್ಟಿಕೊಂಡ ನಮ್ಮ ಅರಮನೆ ...ಒಹ್ ಅದು ಸುಂದರ ಕಾಲ . ಹೀಗೆ ಆಟವಾಡುವಾಗ ನಮ್ಮ ದೃಷ್ಟಿಗೆ ಬೀಳುತ್ತಿದ್ದುದು ಮಣ್ಣಿನಲ್ಲಿ ಇರುತ್ತಿದ್ದ ಚಿಕ್ಕ ಚಿಕ್ಕ ಕುಳಿಗಳು. ಸುಂದರ ಹುಡುಗಿಯೊಬ್ಬಳ ಕೆನ್ನೆಯ ಗುಳಿಗಳಂತೆ ನುಣುಪಾದ ಮಣ್ಣಿನಲ್ಲಿನ ಈ ಕುಳಿಗಳು ಕಂಡರೆ ನಮ್ಮ ಉಳಿದೆಲ್ಲ ಆಟಗಳೂ ಹಿಂದೆ ಸರಿದು  ಅದರಲ್ಲಿನ "ಗುಬ್ಬಚ್ಚಿ" ಹುಡುಕುವ ಆಟ ಪ್ರಾರಂಭವಾಗುತ್ತಿತ್ತು ! ಯಾರಿಗೆ ಹೆಚ್ಚು ಗುಬ್ಬಚ್ಚಿ ಸಿಗುತ್ತೋ ಅವರು ಗ್ರೇಟ್ .  ಆ ಕುಳಿಯ ಬಳಿ ಕುಳಿತು ಹತ್ತಿರ ಮುಖವೊಡ್ಡಿ " ಗುಬ್ಬಚ್ಚಿ ಗುಬ್ಬಚ್ಚಿ ನಿಂಗೆ ಚಾಕ್ಲೇಟ್ ಕೊಡ್ತೀನಿ ಹೊರಗೆ ಬಾ , ಬಿಸ್ಕೆಟ್ ಕೊಡ್ತೀನಿ ಹೊರಗೆ ಬಾ , ನನ್ನ ಮನೆ ಕೊಡ್ತೀನಿ ನಿನ್ನ ಮನೆ ಕೊಡ್ತೀಯಾ ." ಇತ್ಯಾದಿಯಾಗಿ ಮೆಲ್ಲಗೆ ಮಾತನಾಡಿಸುತ್ತಾ ನಾಜೂಕಾಗಿ ಬೆರಳುಗಳಿಂದ ಆ  ಕುಳಿಯನ್ನು ಕೆದಕಿ ಅದರೊಳಗೆ ಅಡಗಿರುವ ಪುಟ್ಟ ಕೀಟವನ್ನು ಹೊರತೆಗೆದು ಅಂಗೈ ಮೇಲಿಟ್ಟುಕೊಂಡಾಗಿನ ಸಂತೋಷ.... ವಿವರಿಸಲಾಗದ್ದು .  ನಂತರ ಅದನ್ನು ಬೆಂಕಿಪೆಟ್ಟಿಗೆಯಲ್ಲಿಟ್ಟು ಸಾಕುತ್ತೇನೆಂದುಕೊಳ್ಳುವುದು ....ಆದರೆ ಏನು ಆಹಾರ ಕೊಡಬೇಕೆಂದು ತಿಳಿಯದೆ ಸಿಕ್ಕಿದ್ದೆಲ್ಲ ಹಾಕಿ ಅದು ಅಲ್ಲೆ ಸಾಯುವುದು , ಅದನ್ನು ನೋಡಿ ಅಳುತ್ತಾ ಕೂರುವುದು , ಅಮ್ಮ ಗದರಿಸುವುದು...ಒಹ್ ಎಷ್ಟೊಂದು ನೆನಪುಗಳು....

ಬಾಲ್ಯದ ಈ ಮೆಚ್ಚಿನ ಜೀವಿಯನ್ನು ನಾನು ಮರೆತೇ ಬಿಟ್ಟಿದ್ದೆ . ಇತ್ತೀಚೆಗೆ ಫೇಸ್‍ಬುಕ್‍ನಲ್ಲಿ  ತಂಗಿಯೊಬ್ಬಳು ಇದನ್ನು ಹುಡುಕಿದ್ದರ ಫೋಟೋ ಹಾಕಿದಾಗಲೆ ಮತ್ತೆ ಇದು ನೆನಪಿಗೆ ಬಂದದ್ದು . ಈ ಬಾರಿ ಊರಿಗೆ ಹೋದಾಗ ಮಗಳನ್ನು ಕಟ್ಟಿಕೊಂಡು ಗುಬ್ಬಚ್ಚಿ ಹುಡುಕಿ ತೆಗೆದು ಸಂತಸ ಪಟ್ಟಿದ್ದಾಯ್ತು.

ಹಾಂ ..ಪಕ್ಷಿ ಜಾತಿಗೆ ಸೇರಿದ ಗುಬ್ಬಿಗೂ , ಕೀಟಗಳ ಜಾತಿಗೆ ಸೇರಿದ ಈ ಪುಟ್ಟ ಜೀವಿಗೂ ಯಾವ ರೀತಿಯಲ್ಲೂ ಸಂಭಂದವಿದ್ದಂತಿಲ್ಲ . ಆದರೂ ನಾವು ಇದನ್ನು ಕರೆಯುತ್ತಿದ್ದುದು " ಗುಬ್ಬಚ್ಚಿ "  ಎಂದು . ಕನ್ನಡದಲ್ಲಿ ಇದಕ್ಕೆ ಬೇರೆ ಹೆಸರುಗಳೇನಿವೆಯೋ ಗೊತ್ತಿಲ್ಲ. ಇಂಗ್ಲಿಷ್‍ನಲ್ಲಿ ಇದರ ಹೆಸರು ಆಂಟ್ಲಯನ್ (Antlion ) .  ಲೇಸ್‍ವಿಂಗ್ಸ್ ಎಂಬ ಕೀಟದ ಮರಿ (nymph ) ಇದು . ಎಲ್ಲ ಕೀಟಗಳ ಲಾರ್ವಾಗಳಿಗೂ ಭಯಂಕರ ಹಸಿವು . ಕಂಬಳೀಹುಳು ತನ್ನ ಗಾತ್ರಕ್ಕೆ ಅತಿ ಎನ್ನಿಸುವಷ್ಟು ತಿನ್ನುತ್ತಲ್ಲವೆ ಹಾಗೆ , ಈ ಪುಟ್ಟ ಮರಿಗಳಿಗೂ ಅಗಾಧ ಹಸಿವು.  ಇರುವೆ , ಜೇಡ , ಚಿಕ್ಕ ಪುಟ್ಟ ಕೀಟಗಳು ಇದರ ಆಹಾರ.   ಹೆಚ್ಚು ಕಡಿಮೆ ತನ್ನ ಗಾತ್ರದಷ್ಟೇ ಇರುವ ತನ್ನ  ಆಹಾರಕೀಟವನ್ನು ಬೇಟೆಯಾಡಲು ಇದು ಬಳಸುವ ತಂತ್ರ ವಿಶಿಷ್ಟವಾದುದು.

ಹೆಣ್ಣು ಲೇಸ್‍ವಿಂಗ್ಸ್ ಕೀಟವು ಮಣ್ಣಿನಲ್ಲಿ ಮೊಟ್ಟೆಗಳನ್ನಿಡುತ್ತದೆ. ತಿಂಗಳ ನಂತರ ಹೊರಬರುವ ಮರಿ " ಆಂಟ್ಲಯನ್ ಅಥವ ಗುಬ್ಬಚ್ಚಿ "  ತಾಯಿಯನ್ನು ಹೋಲುವುದಿಲ್ಲ . ಮರಿಗೆ ರೆಕ್ಕೆಗಳಿಲ್ಲ. ಮೃದುವಾದ ದೇಹದಲ್ಲಿ  ಹೆಡ್ , ಥೊರಕ್ಸ್ , ಮತ್ತು ಅಬ್ಡಮನ್ ಎಂಬ ಭಾಗಗಳಿದ್ದು ಮೂರು ಜೊತೆ ಕಾಲ್ಗಳು ಮತ್ತು ಒಂದು ಜೊತೆ ಸಧೃಡವಾದ ಕೊಂಬುಗಳಿವೆ.

ಮರಳುಮಿಶ್ರಿತ ಸಡಿಲವಾದ ಮಣ್ಣಿನಲ್ಲಿ ಈ ಗುಬ್ಬಚ್ಚಿ ತನ್ನ ಹಿಂಭಾಗದಿಂದ(ಹಿಮ್ಮುಖವಾಗಿ) ವೃತ್ತಾಕಾರವಾಗಿ ತಿರುಗುತ್ತಾ ಚಿಕ್ಕ  ಕುಳಿಯನ್ನು ನಿರ್ಮಿಸುತ್ತದೆ.  ಆ  ಕುಳಿಯ ಕೆಳಭಾಗದ ಮಣ್ಣಿನಲ್ಲಿ ಕೊಂಬುಗಳನ್ನು ಮಾತ್ರ ಮೇಲೆ ಚಾಚಿ  ಅಡಗಿ ಕೂರುತ್ತದೆ.  ಇರುವೆಯಂತಹ ಚಿಕ್ಕ ಪುಟ್ಟ ಕೀಟಗಳು ಈ ಕುಳಿಯೊಳಗೆ ಬಿದ್ದಾಗ ಕೊಂಬುಗಳಿಂದ ಮಣ್ಣನ್ನೆರಚುತ್ತಾ ಅದು ಮೇಲೆ ಹತ್ತಿ ತಪ್ಪಿಸಿಕೊಳ್ಳದಂತೆ ತಡೆದು , ನಂತರ ಅವುಗಳ ಜೀವದ್ರವ್ಯವನ್ನು ಹೀರುತ್ತದೆ ಈ ಆಂಟ್‍ಲಯನ್ .

 ಸುಮಾರು ಎರಡು ಮೂರು ವರ್ಷಗಳ ಕಾಲ ಬದುಕುವ ಈ ಗುಬ್ಬಚ್ಚಿಗಳು ನಂತರ ತನ್ನ ಸುತ್ತಲೂ ಕೋಶ ನಿರ್ಮಿಸಿಕೊಂಡು "ಪ್ಯೂಪ" ವಾಗುತ್ತದೆ. ಎರಡು ಮೂರು ವಾರಗಳಲ್ಲಿ ಸಂಪೂರ್ಣವಾಗಿ ರೂಪಾಂತರ ಹೊಂದಿ ಬೆಳೆದ ರೆಕ್ಕೆಗಳುಳ್ಳ ಕೀಟವಾಗಿ ಹೊರಬರುತ್ತದೆ. ಈ ಹಂತದಲ್ಲಿ ಇದು ಬದುಕುವುದು ಸುಮಾರು ನಲವತ್ತು ದಿನಗಳಷ್ಟೇ. ಅಂದರೆ ಈ ಲೇಸ್‍ವಿಂಗ್ಸ್ ಕೀಟಕ್ಕೆ ಅತೀ ದೀರ್ಘಾವಧಿಯ ಬಾಲ್ಯಕಾಲವೆಂದಾಯ್ತಲ್ಲವೆ. ನಮಗೂ ಹೀಗೆ ಇಷ್ಟು ದೀರ್ಘ ಬಾಲ್ಯ ಇದ್ದಿದ್ದರೆ !!!

ಈ ಕೀಟದ ಬಗ್ಗೆ ಮಾಹಿತಿ ಜಾಲಾಡುತ್ತಿರುವಾಗ ತಿಳಿದ ವಿಷಯವೆಂದರೆ ಪಾಶ್ಚಾತ್ಯ ದೇಶಗಳಲ್ಲೂ ಇದು ಚಿಣ್ಣರಿಗೆ ಇಷ್ಟವಾದ ಜೀವಿ. ಅಲ್ಲೂ ಸಹ ಇವನ್ನು ಹಿಡಿದು ವೈಜ್ಞಾನಿಕವಾಗಿ ಸಾಕುತ್ತಾರಂತೆ. ( ಆದರೆ ನಮ್ಮಂತೆ ಬೆಂಕಿಪೆಟ್ಟಿಗೆಯಲ್ಲಿಟ್ಟು ಸಾಕುವ ಸಾಹಸ ಅವರು ಮಾಡುವುದಿಲ್ಲ ಬಿಡಿ ) ಕೆಲವೊಂದು ಅಭ್ಯಾಸಗಳು ಹೇಗೆ ದೇಶ ಕಾಲ ಎಲ್ಲವನ್ನೂ ಮೀರಿದವುಗಳಾಗಿರುತ್ತವಲ್ಲವೆ?